Members_and_Volunteers(Mgl)

Ахиллис сайн дурынхны товч танилцуулга

Ахиллис Монгол  ОУ-ын байгууллага нь аливаа үйл ажиллагаанд тогтмол оролцдог 100 орчим сайн дурын ажилтантай. Тэд өөрсдийн санаачлагаар дараах ангиллын дагуу хуваагдаж сайн дурын үйл ажиллагаагаа явуулдаг. Үүнд:

  • Хөтөлбөр хариуцсан сайн дурын гишүүн
  • Хөтөч гүйгч буюу халамжлагч гишүүн
  • Үйл ажиллагаа зохион байгуулагч гишүүн
  • Бүртгэл хариуцсан гишүүн гэх мэт ерөнхий ангилалд хуваагддаг.

Хэрэв та Ахиллис Монгол байгууллагын сайн дурын гишүүн болохыг хүсвэл www.achillesmongolia.mn хаягаар орж гишүүнчлэлийн анкет татаж аван бөглөж илгээгээрэй.

Сайн дурынханд нас хүйс, ажил мэргэжлийн ямар нэг шаардлага тавьдаггүй ба тус байгууллагын үйл ажиллагааг идэвхитэй дэмжих таны зорилго, идэвх санаачлага, оролцоо хамгийн чухал юм.

Өнгөрсөн жилийн 9-р сарын 27нд болсон “Гинжийг тасалъя” нөлөөллийн марафонд хөтөлж гүйх багт харъяалагдан ангийнхаа арван хэдэн охидтой гүйхээр очив. Марафон эхлэх дөхөхөд хамт гүйх хүнээ олоогүй би сандарч эхэллээ. Очоод л хэн нэг хөгжлийн бэрхшээлтэй хүнийг хөтлөөд гүйчих юм шиг амархан санасан нь миний эндүүрэл байсан. Би Ахиллис гэсэн улаан подволктой хүмүүс дээр очоод учраа хэлж тэдний нэгийг удаан гуйсны эцэст хамт гүйхээр боллоо. Тэр хүн Туул ах байсан юм. Гүйхэд нь саад болохгүй, өөрөөс нь удаан гүйхгүй, зогсохгүй бас замаас буцахгүй гэсэн амлалтаар түүнийг би зөвшөөрүүлж чадсан. Учир нь тэрээр залуудаа марафоны тамирчин байсан, одоо ч надаас хавьгүй спортлог ах л даа. Бид хамтдаа гүйсэн. Зогсолтгүй гүйсээр бариандаа ч орсон. Тэр үед л би ойлгож эхэлсэн. Гэрээсээ гарч чадсан нь зорилгодоо хүрдэг юм байна. Зөвхөн хөгжлийн бэрхшээлтэй хүмүүс эсвэл Ахиллисчууд гэлтгүй БҮХ хүмүүсийн хувьд. Гадаа аюултай, хүмүүс ойлгомжгүй, ганцаараа байхад сул дорой болно гэж айсаар байвал хэзээ яаж гэрээсээ гарах вэ. Аюултай, ойлгомжгүй байгаа зүйлсийг аюулгүй болгоход хүмүүс бид өөрсдөө оролцох хэрэгтэй биз ээ. Ахиллисчууд аль хэдийн гэрээсээ гарчихсан улсууд. Тэд бусдыг ертөнцөд хөл тавихад нь тусалж гадаа байгаа аюулыг багасгахын тулд дуугаа өргөж байна. Тэд бүгдийг гэрээсээ гарахыг уриалж байна. Би зорилгынхоо төлөө гадаа зогсож байна. БИ ДАХИН ГҮЙНЭ.

Tsendzesem

Сайн дурын ажил хийхээр бүртгүүлсэн залуус маань олуулаа болсоор байна. Гэхдээ бүр ч олуулаа болох хэрэгтэй. Тиймээс хүн бүр дор хаяж нэг найзыгаа уриалаад сайн дурын ажилд оролцуулаарай. Дараа нь чамд гарцаагүй баярлах болно. Учир нь би анх удаа сайн дурын томоохон үйл ажиллагаанд найзынхаа хүсэлтээр оролцож байлаа. Эргээд бодоход их олон зүйл сурч мэдсэн, бас дурсамжтай сайхан санагддаг. Найзыгаа баярлуулж, найзтайгаа хамт туршлага хуримтлуулаарай. Хамтдаа хөгжицгөөе. БИ ГЭСЭН БОЛГОНЫ ЯВАХ ЗАМ НАРИЙСЧ, БИД ГЭСЭН БҮХНИЙ ЗАМ НЬ ӨРГӨЖИН ДАРДАН БОЛДОГ гэсэн үг байдаг даа!

Uchral

“Гинжийг тасалъя” нөлөөллийн марафон гүйлтэнд хөтөч гүйгчээр гүйхийг хүсэж өглөө болгон өөрийгөө бэлдэж гүйдэг болов. 5 минут, 10 минут, 30 минут цаашлаад 1 цаг тасралтгүй гүйдэг болов. Ийм бэлтгэлтэй байхад болно гэж бодлоо. 2014.09.27-ны өглөө марафоны өглөө бусдад гинжийг таслахад нь туслах зорилготой очив. Ойрын харааны бэрхшээлтэй, ээжтэйгээ ойролцоо насны эгчийг хөтөлж гүйхээр боллоо. Гүйж байх хугацаанд тэр эгч надад нэг ч удаа амаръя гэж хэлээгүй, харин би өөрөө амрах зорилготой “Эгчээ та зүгээ рүү, хоёулаа жоохон амрах уу?” гэж асуусан боловч “Эгч нь зүгээрээ, одоо бариа ойрхон байна” гэж хэлж намайг зоригжуулж бид 2 таван км замыг тасралтгүй гүйсээр бариандаа орсон юм. Өглөө нь би бусдад туслах зорилготой ирсэн бол барианд орсны дараа өөрөөрөө бахархаж, өөрийгөө ялсан мэт гайхалтай мэдрэмж төрсөн билээ. Тэр эгч бид 2 гинжийг тасалж, бие биедээ тусалж, өөрсдийгөө ялцгаасан юм. Бид 2 өөрсдийн төрөлдөө 2-р байранд орсон. Ахиллис надад өөрийгөө ялах, өөрөөрөө бахархах болон бусдад туслах боломжийг олгосон. Би дахин гүйхэд бэлэн байна.

Sain Duriin Ajiltan

Урьд өмнө нь сайн дурын үйл ажиллагаанд оролцож байгаагүй миний хувьд эхэндээ их л амархан юм шиг санагдаж хөтлөөд гүйхэд болчино гэж бодож байлаа.Тэгээд Сараа эгчийн сайн дурынханд зориулсан сургалтанд суугаад ёстой нэг нүд нээгдэх шиг л болсондоо.Зарим хүмүүс гайхаж асууж байсан хөгжлийн бэрхшээлтэй хүмүүс гүйнэ ээ гээд л яагаад заавал марофон гүйлт гэж гээд л .Энэ бүхний хариултыг би жоохон хүйтэн ч гэсэн нар гийсэн тэр өглөө мэдсэн юм. Багынхаа хүүхдүүдийг бүртгээд guide ийн шар хантаазаа өмсөөд бидний урдаас инээмсэглэн ирэх эмээ, тэргэнцэртэй хүү, харааны бэрхшээлтэй өвөө энэ хүмүүсийг хараад тэдний өмнө яг л баатар нь юм шиг санагдаж байлаа. Гэхдээ гүйлт дуусахад тэд бидний баатар байсан юм байна гэдгийг ойлгосон. Бид тэдний гараас нь хөтөлж хойноос нь түрж, замыг нь зааж өгж байгаа ч яг үнэндээ тэд биднээс сэтгэл зүрхээрээ хамаагүй сэтгэлийн тэнхээтэй байдаг гэдгийг энэ гүйлт бол хэн нь түрүүлж барианд орохдоо бус хэн нь сэтгэл зүрхээрээ илүү хатуу чанга бэ гэдгийг нь хүртэл сорьж байх шиг........ Бид энэ нийгэмд нэгнийгээ хөгжлийн бэрхшээлтэй гэж ад шоо үзэлгүй тэдэнд сэтгэл зүрхээрээ гараас нь хөтлөөд гүйх залуус байгаа шүү гэдгийг мэдрүүлэх, мэдэх гайхалтай байсан. Тэр өдрийн баатар бид бүгдээрээ байсан шүү. Энэ бол зөвхөн эхлэл. Бариандааа манайхаан.

Tsetsegbayar

Ахиллисийн дэмжигчдийн тухай

Ахиллисийг дэмжиж буйгаа илэрхийлж “Итгэл Найдвар Боломж” гүйлт, “Ахиллис Хүүхэд” хөтөлбөрүүдийн хүрээнд АНУ болон дэлхийн орон орны урлаг, спортын зүтгэлтнүүд, улс төрийнхөн, нийгмийн сайн сайхны төлөөх үйлстнүүд сайн дурын ажлуудад манлайлан оролцдог. “Achilles International” байгууллагын нэр хүндтэй дэмжигчдийн жагсаалтанд АНУ-ын ерөнхийлөгч асан Билл Клинтон, Английн гүнж Диана, Хунтайж Харри, бизнесийн эрхэм Дональд Трамп, Нью Йорк хотын дарга асан Дэвид Петерсон, Холливуудын кино од Антони Эдуард,  Ланс Армстронг, Арни Хаммер, Жон Войтд нарын олон хүмүүс дэмжигчээр оролцож иржээ.

Ахиллис Монголын хувьд энэ жил анх удаа “Итгэл Найдвар Боломж” бүх нийтийн гүйлтийг 2015 оны 9-р сард зохион байгуулах бөгөөд Улаанбаатар хотын дарга Э.Бат-Үүл, орлогч дарга Ц.Буяндалай нараас эхлэн албан ёсоор дэмжиж байгаа билээ.

Та Ахиллисийн дэмжигч болохыг хүсвэл info@achillesmongolia.mn  хаягаар болон 9903-9680 утсаар холбогдох, эсвэл олон нийтийн сүлжээний www.facebook.com/achillesinternationalmongolia холбоосоор хандаарай. Бид  та бүхэнд  танилцуулга илгээж, үйл ажиллагаандаа урьж оролцуулах болно.

Дэмжигчид юу хийдэг вэ?

  • Хөтөлбөрийн арга хэмжээнд нэгдэж, дуу хоолойгоо гаргах
  • Ахиллис Дэмжигч футболка өмсөж, түүнийгээ илэрхийлэх, бусдыг уриалаах